“Микрокредитбанк” сармоялари – қишлоқ фаровонлигига

Кичик бизнес ва хусусий тадбиркорликни сармоялашга ихтисослашган “Микрокредитбанк” очиқ акциядорлик тижорат банки соҳага сармоялар бериш билан биргаликда тадбиркорликни ривожлантириш ва микросармоялар самарадорлигини ошириш, айниқса кичик сармоялардан катта натижаларга эришиш борасида изчил тарзда ташкилотчилик ишлари олиб бормоқда. Яқиндагина бепаён Жиззах буғдойзорлари оғушидаги Ғаллаоролнинг Лалмикор қўрғонида микросармоялар эвазига қишлоқ аҳлига 10 га яқин энг зарур хизмат турларини тақдим этадиган комплекснинг очилиши банк мутахассислари билан тадбиркорларнинг амалий мулоқотига айланиб кетган эди. Шу кунларда банк ўзининг қашқадарёлик мижозлари даврасига ташриф буюрди. Жаҳон иқтисодий кризиси кечаётган даврдаги бундай учрашувлар тадбиркорликни ривожлантириш, микросармоялардан самарали фойдаланиш ва яратувчилик ҳамда фаровонлик ишига кўпроқ ҳисса қўшиш йўлидаги амалий сабоқ вазифасини ўтамоқда.

Маълумки, банк 2006 йил 5 майда Ўзбекистон Республикаси Президентининг ”Микрокредитбанк” акциядорлик тижорат банкини ташкил этиш тўғрисида” ги Фармони асосида иш бошлаган эди. Ўтган давр мобайнида кичик бизнес ва хусусий тадбиркорлик субъектларига хизмат кўрсатиш учун кенг имкониятларни таъминлайдиган инфратузилма яратилди. Бугунги кунда тадбиркорларга тўлақонли банк хизматларини кўрсатувчи филиаллар сони – 80 тани, минибанклар сони – 271 тани, агентиликлар эса 24 тани ташкил этмоқда. Жумладан, Қашқадарё вилоятида банкнинг 9 филиали, 39 минибанки ва кўплаб агентликлари ишлаб турибди.

2008 йилнинг 10 ноябрида Ўзбекистон Республикаси Президентининг ”Микрокредитбанк” акциядорлик-тижорат банкининг тадбиркорлик субъектларини қўллаб-қувватлаш борасидаги фаолиятини янада кенгайтириш чора-тадбирлари тўғрисида”ги Фармони эълон қилинди. Ушбу Фармон банк зиммасига кичик бизнес ва хусусий тадбиркорликни қўллаб-қувватлаш йўналишида янада катта ва аниқ вазифалар юклади. Муҳими, банкнинг кичик бизнес ва хусусий тадбиркорлик ҳисобига аҳоли бандлигини таъминлаши, тадбиркорлик субъектларининг замонавий техника, технология ва ускуналар билан жиҳозланишига ёрдам бериши, ички ва ташқи бозорлар учун рақобатбардош товарлар ишлаб чиқаришни ўзлаштириш учун имтиёзли микрокредитлар ажратишидан тортиб фермер ва деҳқон хўжаликларига уруғлик ва кўчатлар сотиб олишга, ва ҳатто тупроққа ишлов беришга қадар кенг доирадаги заруратларини бартараф этиш борасида тадбиркорларни моддий жиҳатдан қўллаб-қувватлаши, улар ишлаб чиққан рақобатбардош маҳсулотлар кўргазма-ярмаркаларини ташкил этиши, реклама компанияларини ўтказиши сингари тадбирларни амалга ошириши белгилаб берилди. Шу боис, банк мунтазам равишда вилоятлар ва узоқ туманларда тадбиркорликни ривожлантириш борасида анжуманлар ўтказиб келмоқда.