Объявлен ТОП20 лучших карт Visa Classic. Лидер рейтинга Infin Bank Подробнее

BMT Taraqqiyot Dasturi «Mikromoliyalashtirish tizimini rivojlantirishni qo'llab-quvvatlash» loyihasini taqdim etdi

26.01.2010

Toshkentdagi «Poytaxt» Biznes markazining majlislar zalida BMTning O'zbekistondagi Taraqqiyot dasturi yangi - «Mikromoliyalashtirish tizimini  rivojlantirishni qo'llab-quvvatlash» loyihasi taqdimot marosimi bo'lib o'tdi. 

«Mikromoliyalashtirish tizimini rivojlantirishni qo'llab-quvvatlash»  loyihasi BMTning O'zbekistondagi Taraqqiyot dasturining yangi tashabbusi bo'lib, mikromoliya sektorini yanada rivojlantirish va barqaror ravishda o'stirishni qo'llab-quvvatlashga yo'naltirilgan. Loyihaning asosiy maqsadi barcha manfaatdor tomonlar, xususan, hukumat muassasalari, xalqaro donor va moliya institutlari harakatlarini uyg'unlashtirish yo'li bilan ta'sirchan, samarali va barqaror mikromoliyaviy sektorni yaratishga ko'mak berishdir. 

Ta'kidlash joizki, Loyihaning asosiy vazifalari mikromoliyalashtirishga oid qonunchilik bazasini takomillashtirishga texnik yordam ko'rsatish va mikromoliyalashtirishning ijtimoiy ta'sirini ilgari surish, Markaziy bankning mikromoliya sektorini muvofiqlashtirish va nazorat etish borasidagi salohiyatini mustahkamlash, shuningdek, mikrokredit tashkilotlarining barqaror tizimini yaratish va Mikromoliya tashkilotlari va kredit uyushmalari Milliy Assotsiatsiyasi institutsional salohiyatini mustahkamlashdan iborat. Bular esa mikromoliya tashkilotlarining rivojlanishi hamda mustahkamlanishi, moliyalashtirish manbalaridan foydlanish yo'llarini kengaytirishga xizmat qiladi. Loyiha faoliyatining muhim qirralaridan biri axborot aktsiyalari uyushtirish va turli nashrlar ishlab chiqish va ularni tarqatish yo'li bilan aholi, xususan, ayollar va qishloq aholisining mikromoliyalashtirish borasidagi xabardorligini oshirishdir.

Taqdimot marosimida so'zga chiqqan Loyiha rahbari Dildora Tadjibaeva Markaziy bank, Vazirlar Mahkamasi, respublika bank tizimi, mikrokredit tashkilotlari, tegishli vazirliklar, Loyiha faoliyatining asosiy yo'nalishlariga mos faoliyat ko'rsatayotgan xalqaro tashkilotlar vakillarini rejalashtirilgan tadbirlar va kutilayotgan natijalar bilan tanishtirdi. Bundan tashqari, tadbir qatnashchilari O'zbekistonda mikromoliyalashtirishning bugungi ahvoli va mikromoliyalashtirishni rivojlantirish istiqbollari, shuningdek, Mikromoliya markazining Markaziy Osiyodagi faoliyati bilan tanishish imkoniga ega bo'ldilar.

Shu o'rinda O'zbekistonda mikromoliyalashtirishning dolzarbligi va joriy etilgan tashabbuslarga to'xtab o'tish joiz. Mikromoliyalashtirishning paydo bo'lishi va rivojlanishi tarixi shundan dalolat beradiki, O'zbekiston iqtisodiyoti, ayniqsa, kichik biznes bank kreditlari olishga muhtoj bo'lgan aholiga bankka qo'shimcha bo'lgan ushbu moliyaviy xizmatlar tarmog'i g'oyat asqotadi. Katta bo'lmagan pul mablag'larini tezkorlik bilan olish imkoniyati kichik tadbirkorlarga joriy muammolarni bartaraf etish, o'z biznesini yanada katta ishonch bilan rejalashtirishga ko'mak berdi.

BMTning O'zbekistondagi Taraqqiyot dasturi ko'p yillardan beri farovonlikni oshirish va Ming yillik taraqqiyoti maqsadlariga erishish, ayniqsa, qashshoqlik darajasini qisqartirish, ayollarning huquq va imkoniyatlarini o'stirishga qaratilgan tashabbuslarni qo'llab-quvvatlab keladi. 1998 yildan boshlab, BMT Taraqqiyot dasturi tomonidan mamlakatda birinchi nodavlat mikrokredit tashkilotiga asos solishga ko'mak beruvchi ikkita loyiha sinab ko'rildi. 

Mikromoliyalashtirish dasturlarining amalda sinab ko'rilishi bu kabi xizmatlarning yashovchanligi va ularga talab borligini ko'rsatdi, bu holga mamlakat hukumati tomonidan katta qiziqish bildirildi. Qayd etish kerakki, mikromoliyalashtirishni rivojlantirishning 2007-2010 yillarga mo'ljallangan davlat dasturi qabul qilingan bo'lib, unga mikromoliyalashtirishning turli tarkibiy, xususan, ta'lim, maslahat, tashkiliy, huquqiy va amaliy qismlari kiritilgan. 

Похожие новости
“Ўзсаноатқурилишбанк”нинг махсус бўлими очилди

09.09.2019

“Ўзсаноатқурилишбанк”нинг махсус бўлими очилди

Muvaffaqiyatli mikromoliyalash kaliti: yanada yaxshi natijalarga erishish uchun boshqarish san`ati

14.02.2011

Muvaffaqiyatli mikromoliyalash kaliti: yanada yaxshi natijalarga erishish uchun boshqarish san`ati

Муваффақиятли микромолиялаш калити: янада яхши натижаларга эришиш учун бошқариш санъати

11.02.2011

Муваффақиятли микромолиялаш калити: янада яхши натижаларга эришиш учун бошқариш санъати



Система Orphus