ATB "Qishloq qurilish bank" va O’zbekiston Respublikasi Moliya Vazirligining G’aznachiligi o’rtasida elektron qaydnoma tizimi yo’lga qo’yildi.

ATB "Qishloq qurilish bank" o’z faoliyatini yanada kengaytirishga alohida e'tibor qaratib kelmoqda va  zamonaviy informatsion texnologiyalar yutuqlaridan keng foydalanilgan holda, bank tomonidan yangi xizmatlarni joriy etish borasida faol ish olib borilmoqda.

Xususan, bugungi kunda "Qishloq qurilish bank" va O’zbekiston Respublikasi Moliya Vazirligining G’aznachiligi o’rtasida "Elektron Qaydnoma" tizimi yo’lga qo’yildi.

Bu tizimni joriy qilinishi  mijozlarga bir qancha quylayliklarni yaratish bilan bir qatorda bank xarajatlarini kamaytirish, bank amaliyotlarini bajarishga sarflanadigan vaqtni kamaytirishga asos bo’ladi.

Mazkur tizim orqali endilikda byudjet korxonalari va tashkilotlari ishchi-xodimlarining oylik ish haqi va unga tenglashtirilgan to’lovlari UzASBO (O’zbekiston byudjet tashkilotlarining avtomatlashtirilgan tizimi) dasturi va bankning avtomatlashtirilgan dasturi yordamida bankda ochilgan plastik kartochkalarga avtomat tarzda kirim qilinadi.

Yangi tizimning bir qator afzalliklari shundaki, ish haqi qaydnomalari elektron raqamli imzo bilan tasdiqlangan holda G’aznachilikning UzASBO dasturidan bankka maxsus himoyalangan kanal orqali jo’natilib, mijozlarning plastik karta hisob varaqlariga pul mablag’lari avtomatik ravishda kirim qilinadi. Bu korxona va tashkilotlar ish haqi qaydnomalarini bankka qog’oz va elektron ko’rinishdagi shakllarini taqdim etish uchun sarflangan vaqtni tejash imkonini beradi.

Ushbu loyiha bank filiallarida muvaffaqiyatli sinovdan o’tkazilib, yakunlangandan so’ng, xuddi shu tizim asosida pensiya to’lovlarini plastik kartochkalar hiobvaraqlariga o’tkazilishini avtomatlashtirish yo’lga qo’yiladi.

Bank matbuot xizmati