Bank siriga nigoh tashlaymiz

Hozirgi raqamli texnologiyalar rivojlangan asrda har bir ma'lumot qimmatli hisoblanadi. Bankdagi sizning ma'lumotingiz ham qimmatli ma'lumotlardandir.

Istemolchiga tegishli quyidagi ma'lumotlar bank tomonidan sir saqlanadi:

• bankda mijoz tomonidan bajarilgan operatsiyalar;
• hisobvaraqalar va omonatlarga tegishli ma'lumotlar;
• bank xizmati ko‘rsatilishi munosabati bilan mijoz haqida olingan ma'lumotlar;
• mijozning bank seyflari va binolarida saqlab turilgan mol-mulki, uning xususiyati va qiymati haqidagi ma'lumotlar;
• mijoz topshirig‘iga binoan yoki uning foydasini ko‘zlab amalga oshirilgan banklararo operatsiyalar;
• pensiya badallarining miqdori va summalarining harakati;
• fuqaroning shaxsiy jamg‘arib boriladigan pensiya hisob varag‘idagi pensiya jamg‘armasi to‘g‘risidagi ma'lumotlar.

Bundan tashqari bank xodimining mehnat shartnomasi tugagan taqdirda ham u o‘zi bilgan bank siriga taaluqli bo‘lgan ma'lumotlarni oshkor qila olmaydi, bunday holatlar mehnat shartnomasida ko’zda tutilishi mumkin.

Shuningdek, bank, uning mijozi (vakili) va O‘zbekiston Respublikasi Markaziy bankidan tashqari boshqa barcha shaxslar uchinchi shaxslar hisoblanib, ularga yuqorida keltirilgan bank sirini tashkil etuvchi ma'lumotlar oshkor etilmaydi.

Biroq, yuqorida keltirilgan ma'lumotlar zarur deb topilganda qonun bilan belgilab qo‘yilgan ayrim davlat idoralariga taqdim etiladi. Ularga quyidagilar kiradi: prokuratura, tergov va surishtiruv organlari, davlat soliq xizmati organlariga va boshqa “Bank siri” to‘g‘risidagi qonunda belgilangan vakolatli organlar.