QR-online: Quruq qo‘l bilan borsangiz ham, quruq qaytarishmaydi

XXI asrda har qanday masalaning innovasion yechimini topishga intilyapmiz. Maqsad — insonlar hayotini yanada yengillashtirish. Qulayliklar esa bugun har jabhada kerak. Raqobat ham shu mezonga ko‘ra belgilanyapti.

Prezidentimizning tegishli qaroriga ko‘ra, Markaziy bank va tijorat banklari zimmasiga QR-kod orqali to‘lovlarni amalga oshirishning standartlashtirilgan va universal tizimini joriy etish vazifasi yuklatilishi ayni shu zarurat mahsuli.

Xalq banki innovasion va moslashuvchan moliya muassasasi sifatida 2020 yilda “QR-online” tizimini amaliyotga joriy etdi. Hozir bankning barcha mijozlari mazkur tizimdan samarali foydalanish imkoniyatiga ega.

Xo‘sh, “QR-online” tizimi qanday afzalliklarga ega?

Masalan, bir mijozning bankda hisob raqami bor va undagi mablag‘laridan savdo do‘konining QR-kodini telefoni orqali skaner qilgan holda to‘lovni amalga oshirish mumkin. Bu plastik kartochkangiz yoningizda bo‘lmasa-da, to‘lov qilishingiz imkoniyati bor, deganidir.

Bu tizim tadbirkorlar uchun ham qulay. Qanday, deysizmi? Misol uchun, savdo do‘koniga ega tadbirkorning hisob raqami Xalq bankida, uning xaridorlari QR-kod orqali amalga oshirgan to‘lov to‘g‘ridan-to‘g‘ri tadbirkorning hisob raqamiga kelib tushadi.

Bugungi kunda Xalq bankining 10176 ta yuridik mijozi “QR-online” tizimidan samarali foydalanib kelmoqda.