RIA-Reyting agentligi MDH Top-200 banklar ro‘yxatini e’lon qildi

RIA-Reyting agentligi tomonidan tayyorlangan MDH Top-200 banklari ro’yxatiga birdaniga 7 o’zbek banki kirdi, deya xabar qiladi O’zbek telegraf agentligi (O’zTAG).

Top-200 banklar ro’yxati RIA-Reyting saytida e'lon qilingan.

O’zbekistonning eng yirik banki - Tashqi iqtisodiy faoliyat milliy banki 7,3% o’sish namoyon qilib, aktivlari miqdorini $5,1 mlrd.ga yetkazgan holda reytingda 55 o’rinni oldi.

Yana bir o’zbek banki - "O’zsanoatqurilishbank" 2014 yil 1 yanvar holatiga kelib aktivlari hajmini dollar hisobida 22% o’stirdi va $3,1 mlrd.ga yetkazgan holda reytingning 89 o’rinda joylashdi.

Qolgan banklar quyidagi o’rinlarni egalladilar: "Asaka" banki - 118 o’rin, Ipoteka-bank (155), Xalq banki (166), Agrobank (172), "Qishloq qurilish bank" (177).

MDH Top-200 banklari reytingi RIA Reyting reyting agentligi tomonidan MDH bank tarmog’ining 2013 yil yakunlari bo’yicha tadqiqi asosida tuzilgan.

Reyting ma'lumotlari banklarning moliyaviy hisobotlari, MDH mamlakatlari Markaziy banklari statistik byulletenlari va boshqa ochiq manbalardan olingan. Ushbu reyting agentlik ekspertlari tomonidan tuzilgan MDH banklarining aktivlar miqdori bo’yicha to’rtinchi reytingdir.

(O’zTAG).