Xalq banki kurash rivojiga hissa qo‘shadi

Kurash — shunchaki sport turi emas, balki milliy qadriyatimiz. Sababi, u mardlik, jasurlik va halollik timsoli. Kurashchi gilamga sovrin uchungina chiqmaydi, balki or uchun chiqadi. Sharaf uchun olishadi.

Shu sababli mamlakatimizda kurashni yanada rivojlantirish choralari ko‘rilyapti. Albatta, bu sohadagi islohotlar uchun zamonaviy infratuzilma va mustahkam moddiy-texnika bazasi kerak. Ya’ni qo‘shimcha moliyaviy manbalarga ehtiyoj bor.

Shundan kelib chiqib, Prezidentimiz 2020-yil 4-noyabr kuni “Kurash milliy sport turini rivojlantirish va uning xalqaro nufuzini yanada oshirish chora-tadbirlari to‘g‘risida”gi Qarorni imzoladi. Unga binoan, mazkur sport turini 2025-yilgacha yangi bosqichga olib chiqish bo‘yicha Konsepsiya hamda “Yo‘l xaritasi” tasdiqlangan.

Mazkur hujjatlar ijrosi doirasida bugun aksiyadorlik tijorat Xalq banki va O‘zbekiston Kurash federatsiyasi o‘rtasida “Kurashlotto” lahzali, pul yutuqli lotereya o‘yinini tashkil etish va o‘tkazish to‘g‘risida”gi bitim imzolandi. Unga ko‘ra, lotereya biletining bahosi 5000 so‘mni tashkil etadi. U 3 million dona miqdorida sotuvga chiqariladi.

“Kurashlotto”ni o‘tkazishdan olinadigan sof foydaning 60 foizi O‘zbekiston Kurash federatsiyasining bankdagi hisobraqamiga o‘tkaziladi, 40  foizi esa Xalq banki ixtiyorida qoldiriladi.

“Kurashlotto” lotereyasini tashkil etish va o‘tkazishga doir barcha tashkiliy tadbirlar Xalq banki tomonidan amalga oshiriladi. Jumladan, lotereya biletlarining xorijiy kompaniyalar tomonidan tayyorlanishi va Toshkentga keltirilishi bo‘yicha tenderlarni tashkil etish va o‘tkazishni ta’minlaydi.

O‘yin biletlari Xalq banki filiallari, Bank xizmatlari markazlari, minibank va maxsus kassalari orqali sotiladi.

Kurash federatsiyasi tomonidan “Kurashlotto”ning ommabopligini oshirish maqsadida tashkiliy qo‘mita tuziladi.

Qisqa qilib aytganda, Prezidentimiz qarorida belgilangan vazifalar ijrosi kelgusida kurashimiz dovrug‘ining dunyoga yanada keng yoyilishiga xizmat qilishi, shubhasiz.

Brifingda jurnalistlarning mavzuga doir barcha savollariga javoblar berildi.

Bank axborot xizmati