Xalq banki xodimlari ulug‘ shoirga ehtirom ko‘rsatishdi

Bugun Sharq Renessansining yirik namoyandasi — jahon sivilizasiyasi tarixi, turkiy tilli xalqlar madaniy-ma’naviy hayoti rivojida alohida o‘rin tutgan Alisher Navoiy bobomizning 580 yilligi mamlakatimiz bo‘ylab keng nishonlanmoqda.

Ulug‘ mutafakkir tavalludiga bag‘ishlangan ana shunday tadbirlardan biri Alisher Navoiy nomidagi O‘zbekiston Milliy bog‘ida bo‘lib o‘tdi. Unda davlat va jamoat arboblari, shoir va yozuvchilar bilan bir qatorda, Xalq banki jamoasi vakillari ham qatnashdi.

Marosimda so‘zga chiqqanlar ulug‘ mutafakkir merosining olamshumul ahamiyati, komil shaxs tarbiyasidagi o‘rni haqida atroflicha so‘z yuritishdi.

— Alisher Navoiy asarlarining moliya muassasalari xodimlari uchun ham ahamiyati beqiyos, — deydi Xalq banki Axborot xizmati yetakchi mutaxassisi Dilshod Nazarov. — Negaki, ulug‘ mutafakkir hikmatlari eskirmas, hayotimizning barcha jabhalariga daxldor. Bobokalonimiz ma’naviy merosidan vatanparvarlik, odamiylik, ishga va oilaga sadoqat kabi ezgu fazilatlar hamda axloqiy mezonlarni o‘rganishimiz mumkin. 

Tadbirda yangragan mumtoz kuy-qo‘shiqlar, she’riyatning betakror namunalari davraga yanada fayz kiritdi.

Bank Axborot xizmati